Нийгэм
・Нийтэлсэн:
Отгонхүү
・
2015 03 сар 03
・ 4
Нийслэлийн Баянгол дүүргийн 76-р цэцэрлэгийн эрхлэгч Г.Оюунсүрэн хүүхдүүдээ хууль бусаар мөнгө хураасан болохыг мэргэжлийн байгууллага тогтоожээ. Тодруулбал:
Баянгол дүүргийн 76 дугаар цэцэрлэгийн эрхлэгч Г.Оюунсүрэн нь орон тоогоо нэмж мэргэжлийн бус хүн авсан, ажилчидтайгаа зүй бус харьцдаг, хүүхдийн хоолны цаг, дэглэм зөрчдөг, эцэг, эхчүүдээс мөнгө татдаг гэсэн гомдол УИХ-ын Өргөдлийн байнгын хороо болон Мэргэжлийн хяналтын ерөнхий газарт ирсэн байна. Энэ дагуу Мэргэжлийн хяналтын ерөнхий газраас тус цэцэрлэгт шалгалт хийн 13 багшийн гурав нь мэргэжлийн бус, дөрөв нь багшлах эрхгүй байжээ. Цэцэрлэгийн эрхлэгч нь 10 бүлгийн 313 хүүхдийн эцэг, эх, асран хамгаалагч, багш, ажилчдаас албадлагын шинжтэйгээр 14 сая гаруй төгрөг хураан авч зарцуулсан байна. Энэ нь БСШУ болон Сангийн сайдын хамтарсан тушаалаар батлагдсан “Сургууль, цэцэрлэг хөгшүүлэх сангийн үлгэрчилсэн дүрэм”-д заасан “...Хандив, буцалтгүй тусламж цуглуулах нь хандивлагчийн болон тусламж үзүүлэгчийн хүсэл сонирхолд нийцсэн байх бөгөөд нийтийг хамарсан албадлагын болон тэгшитгэн хураасан шинжгүй байна” гэсэн заалтыг зөрчсөн гэсэн үг юм.
Эрхлэгч Г.Оюунсүрэн цэцэрлэгийн сангийн хөрөнгийг Төрийн санд байршуулаагүй, санд төвлөрсөн мөнгийг эцэг, эх, багш нарын гар дээр бэлнээр байлган зарцуулж байжээ. Цэцэрлэгийн гал тогооны таазнаас байнга ус дусдаг, маш их чийгтэй орчинд хоол бэлтгэдэг, хүнсний бүтээгдэхүүнийг зориулалтын бус, чийгтэй орчинд хадгалдаг, хүүхдийн хоолны дээж авалт ил задгай, анги, бүлгийн ариун цэврийн өрөөний бохирын шугам, угаалтуур, суултуурыг солихдоо хүүхэд, багш ажилтны сургалтын орчин дахь эрүүл ахуй, аюулгүй байдлыг хангах нөхцөл бүрдүүлээгүй зэрэг зөрчил улсын байцаагчийн шалгалтаар мөн илэрсэн байна. Иймээс зөрчлийг арилгуулах албан шаардлага өгч биелэлтийг нь дахин шалгах, багшлах эрхгүй нэр бүхий хүмүүсийн асуудлыг шийдвэрлүүлэх тухай албан тоотыг Нийслэлийн Боловсролын газар, БГД-ийн Боловсролын хэлтэст хүргүүлсэн байна.
Тус цэцэрлэг нь анх 1978 онд ОХУ –н тусламжтайгаарбайгуулагдаж ашиглалтанд орсон. Одоогоор 12 бүлэгтэй. 24 цагийн ажиллагаатай 4 бүлэг, өдрийн ажиллагаатай 8 бүлэгт 400-450 хүүхэд хүлээн авч сурган хүмүүжүүлж байна. Нийт 51 багш, ажилчидтай. 1995 оноос эхлэн Хүүхдийн төлөө үндэсний төвийн санаачлагаар “Хөгжлийн бэрхшээлтэй” хүүхдийг 4 бүлэгт авч сургаж байгаа юм байна.
Бид энэ талаар эргэж мэдээлэх болно.
А.Баярмаа
Манай сайт танд таалагдаж байвал LIKE хийгээрэй. Танд баярлалаа.