Нийгэм
・Нийтэлсэн:
Баярмаа
・
2015 03 сар 19
Энэ сарын 18-ны өдөр нийслэл хотод 6 гал түймэр гарсан. Эдгээр гал түймрийн дуудлагын нэг нь хуримын ордны өмнө байрлах Шангри ла 2 барилгын ажилчдын байранд гал гарсан байна. Гэхдээ тус барилгын хамгаалагчид түргэн шуурхай ажилласны үндсэн дээр хүний амь эрсдээгүй байна.
Тодруулбал 2015-03-18-ны шөнийн нэг цаг 25 минутанд “Шангри Ла 2” барилгын талбайд гал гарч байна гэсэн дуудлага онцгой байдлын албанд иржээ. Дуудагын дагуу очиход “Шангри Ла 2” барилгын талбайд байрлах ажилчдын байр шатаж байж. Шатаж байсан объект нэг гарцтай байсан бөгөөд гал гарцны хэсэгт нь гарсан байна. Ажилчдын байранд бүгд найрамдах хятад ард улсын 39 иргэн байжээ.
Барилгын талбайн харуул хамгаалалтын ажилчид шуурхай ажилснаар 39 хүний амийг аварч чаджээ. Хэрэв цаг алдсан бол 39 хүний амь эрсдэл аюултай байсан гэнэ. 2 давхар ажилчдын байранд гарсан гал нийт 90 м2 талбайг хамарчээ.
Онцгой байдлын албанаас гал унтраах 3 ангийн 6 автомашин алба хаагчид ажилласан. Гал гарсан шалтгааныг тогтоохоор шинжээчид шалгаж байна. Өмнө нь “Шангри Ла 2” барилгад том хэмжээний гал гарч байв. Удаа дараа гал гарч байгаа барилгад шалгалт хийж дүгнэн цаашид ямар арга хэмжээ авахаа тодорхойлох болсныг Нийслэлийн онцгой байдлын газар мэдэгдэж байна. Харин “Шангри Ла 2” барилгын гүйцэтгэгч “MCS Пропертис” компани тайлбар өгөхөөс татгалзсан юм.
Манай сайт танд таалагдаж байвал LIKE хийгээрэй. Танд баярлалаа.