Улстөр
・Нийтэлсэн:
Отгонхүү
・
2015 03 сар 25
-Улсын дээд шүүхэд бүртгэлтэй 20 гаруй нам улс төрд оролцож байна-
Цахим сэтгүүлзүйн салбарт нэлээдгүй олон уншигчтай мэдээллийн зарим сайтууд, түүнчлэн нийгэм, улс төр, эдийн засгийн анхаарал татсан асуудлаар судалгаа явуулжээ. Түүнчлэн улстөрчид, улс төрийн намуудын рейтинг тогтоодог судалгааны байгууллагууд “Та улс төрийн намуудад итгэж байна уу” гэсэн судалгааг явуулсан байна. Судалгаанд хамрагдсан нийт иргэдийн 90 гаруй хувь нь итгэхгүй байна гэсэн хариулт өгсөн бол нам төлөвшихгүй байгаа шалтгааныг санхүүжилт ил байдаггүй гэдэгтэй холбон тайлбарласан байна.
![](http://resource.mminfo.mn/mminfo/photo/2015/3/d550acfd3f4f70c5/e6709185b930a001original.jpg)
Өнөөдөр Улсын дээд шүүхэд бүртгэлтэй 20 гаруй нам манай улсад үйл ажиллагаа явуулж байна. Эндээс идэвхитэй үйл ажиллагаа явуулж байгаа нь гарын таван хуруунд багтана. МАН, АН, МАХН, ИЗНН, МҮАН гэсэн парламентад суудалтай улс төрийн намуудын үйл ажиллагаа тодорхой хэмжээгээр идэвхитэй байгаа ч хангалттай гэсэн үнэлгээ авч чадахгүй байгаа юм. Гэтэл нөгөө талд дарга гэсэн нэг л гишүүнтэй, ах дүү амраг саднаараа гарын үсэг цуглуулаад нам байгуулчихсан хүмүүс цөөнгүй байдаг нь нууц биш.
Сонгууль дөхөхөөр уулзалт зохион байгуулж, төр засгийг шүүмжилдэг, аль нэг намтай эвсч нөгөөхийг нь шантаажилдаг байдлаар ажилладаг нам хэтэрхий олон болчихсон. Ногоон үзэл баримтлалаа булаацалдаж хэрэлдэнэ. Нэг нөхөр намдаа гомдохоороо гарч гүйгээд шинэ нам байгуулчихна. Улс төрийн зах зухыг ч гадарлахгүй, оюутны ширээнээс өндийж амжаагүй залуус сэтгэлийн хөөрлөөр нам байгуулж “тоглоно”.
Төрийн албанаас залхаад ирэхээрээ төр засгийн шантаажлагч болохын тулд нам байгуулчихаад өөрөө өөртөө мэдэгдэл бичээд сууж байгаа цөөнгүй жишээ байна. Өнөөгийн нийгэмд нам, сургууль хоёр шиг хэрэггүй зүйл алга. Чанартай чанаргүй боловсрол эзэмшүүлсэн хувийн дээд сургууль, чадвартай, чадваргүй залуусыг улс төрд бэлтгэх нэрийдлээр, шантаажчин болгож бэлтгэх улс төрийн намууд хэтэрхий олширлоо.
Ард түмнийг талцуулан, хуваагдуулж, төрийн дээр нам сандайлснаар ард түмний эрх ашиг бус фракцийн эрх ашиг өнөөгийн нийгэмд үйлчилдэг болчихлоо. М.Энхболд сайд болбол хотын фракци ноёлдог бичигдээгүй хууль бий. У.Хүрэлсүх албан тушаалд очвол Зүүний хүчний холбооныхон ажилтай болдог гэдгийг бид хангалттай харж байна. Н.Алтанхуяг суудлаасаа бууснаар Алтангадас фракцийн ноёрхол задарч, нам дагасан залуус гудамжинд гарч, төрийн албаар дүүрэн Шонхор, МоАХ хоёр ноёлж байгаа жишээг дурьдаад байвал дуусахгүй. Тиймдээ ч дээрх судалгаанд хамрагдсан хүмүүсийн хариулт нэгийг хэлээд байгаа юм. Хөдөө, орон нутаг, нийслэлийн иргэд тэр чигээрээ улс төрийн намд итгэх итгэлээ улам бүр алдаж байгаа.
Ирэх сонгуулиар намыг биш хүнийг нь харж сонгоно гэдэг нь тодорхой болчихсон. Гэтэл 2015 он гарсаар Улсын дээд шүүхэд хэд хэдэн нам бүртгүүлэхээр хандсан байх юм. Юунд ч найдаж, юуны төлөө нам байгуулах гэж байгаа нь тодорхойгүй. 20 гаруй нам, цаашлаад нэрээ авахаар хөөцөлдөж байгаа нэр бүхий намуудыг нэмчихвэл гурван сая монголчууд 30 намтай болж, Геннисийн амжилт тогтоож мэдэх нь. Он гарсаар Улсын дээд шүүхэд гурван ч нам нэрээ бүртгүүлэхээр хандаж татгалзсан хариулт авчээ.
Л.Гүндалайд тойрог олдоогүйгээс нам байгуулахаар шийджээ
Намдаа тунихаараа гарч гүйгээд нам байгуулдаг хэсэг бүлгийн сонгодог жишээ нь УИХ-ын гишүүн асан Л.Гүндалай болох нь. Түүний хувьд өнгөрсөн сонгуулиас хойш намдаа ил далд гомдлоо илэрхийлж байсан. Албан тушаалаас хойш тавьж, тойрог өгөөгүй хэмээн удаа дараа хэвлэлээр гомдлоо дайсан удаатай. 2012 оны сонгуулийн дараа Эрүүл мэндийн сайдыг авах байсан ч өгөөгүй. АН-ыг ганц ч суудалгүй байхад би тэмцсээр байгаад ялалт авсан. АН өдий зэрэгтэй яваа нь миний ач хэмээн тунирхаж явсан экс гишүүн арайхийн Хилийн боомтын даргаар очсон ч удаан сууж чадаагүй юм.
Засгийн газар бүтцээ цомхотгохдоо Хилийн боомтыг хамгийн түрүүнд татан буулгасан нь дахиад л Л.Гүндалайг гомдоосон явдал болсон. Тиймээс сонголтоо хийж байгаагаа өчигдөр зарлав. Тэрбээр, АН-аас гарч байгаа гэдгээ ил захидлаар мэдэгдсэн бөгөөд намаасаа гарсны дараа Эрдэнэт хотод суурьшихаар шийджээ. Нэг зүйл төгсөх нь нөгөө зүйлийн эхлэл болдог учраас экс гишүүн амьдралаа шинээр эхлүүлж байгаа гэнэ лээ. Нийслэлээс бус орон нутагт намаа байгуулж, тэр намаасаа Эрдэнэт хотоос нэр дэвшч УИХ-д өрсөлдөнө гэв. АН эртнээс энэ тойрогт УИХ-ын гишүүн М.Батчимэгийг сойж байгаагаа ил зарлачихсан учраас Л.Гүндалайд өөр сонголт олдоогүй бололтой.
Залуус орон нутгаа хөгжүүлэх гэж нам байгуулсан гэв
Өнгөрсөн оны арванэгдүгээр сард залуус улс төрийн нам байгуулж байгаагаа зарласан билээ. Тодруулбал, улсынхаа нийт 70 гаруй хувийг бүрдүүлдэг залуусын дуу хоолой өнөөгийн нийгэмд орхигдсон, цаашлаад залуус улс төрийн нам, өнөөгийн төр засагт байгаа улстөрчдөд залуус итгэхээ больсон учраас улс төрийн нам байгуулахаар болсон гэв. Гэсэн ч энэ сарын 20-нд Улсын дээд шүүх тэдний хүсэлтийг хүлээн авч хэлэлцээд бүртгэх боломжгүй гэсэн хариулт өгчээ.
“Залуусын нам” нь нам байгуулахад бүрдүүлэх бичиг баримтыг гүйцэд бүрдүүлээгүй учраас намын нэрээ авч чадаагүй билээ. Тэд УИХ-д бус орон нутгийн сонгуульд өрсөлдөж, орон нутгаа хөгжүүлэхээр санал нэгджээ. Их сургуулийн босго алхаагүй байхдаа л улс төр ярьж, улстөрчидтэй зиндаархах болсон өнөөгийн залуусын төлөөлөл тэд байсныг нуугаад яах вэ.
Х.Бат-Ялалт улс төрөөр оролдож эхэллээ
“Иргэдийн шударга шүүх” хөдөлгөөн гэгчийг байгуулж нэг хэсэгтээ л төр засгийг зүхэж, эсэргүүцсэн Х.Бат-Ялалт улс төр сонирхохоор шийдсэн нь саяхных. Тэрбээр энэ сарын 12-нд Улсын дээд шүүхэд “Монгол хүний төлөө нам”-аа бүртгүүлэхээр хандсан ч тусыг эс олов. Учир нь “Монголын хүний төлөө” нам нь мөн л улс төрийн нам байгуулах шаардлага, бичиг баримтаа бүрдүүлж чадаагүй учраас бүдэрсэн юм.
Энэ намын талаархи яриа УИХ-ын гишүүн С.Ганбаатартай үргэлж холбогдож байсан. Хүний төлөө гэх уриа лоозон барьсан С.Ганбаатар гишүүн энэ намыг дэмжиж ажиллахаа ил тод хэлсэн бөгөөд намд шууд элсэнэ гэж хэлэхгүй бөөрөнхий хариулт өгч хэсэг цаг авсан. Тэрбээр, Дархан-Уулаас дахиад сонгогдохын тулд улс төрийн зоригтой шийдвэр гаргаж чадаагүй бөгөөд намайг сонгосон иргэдээсээ асууна гэсэн бөөрөнхий хариулт өгсөн байдаг. Ямартай ч албан тушаалд хүрэхийн тулд нам байгуулдаг, түүгээрээ шантааж хийдэг жишгийг дагах гэсэн Х.Бат-Ялалт нарын санаархал нь Дээд шүүх дээр бүдэрснээр талаар болсон билээ.
Нэг хүнтэй нам нэгээр нэмэгдэх шахлаа
Шинэ оны дараахан Монголын нэг хүний нам гэгчийг бүртгүүлэх шүүх хурал Улсын дээд шүүх дээр болсон юм. Тодруулбал, нэгдүгээр сарын 30-нд Н.Эрдэнэцэцэг гэх эмэгтэй нэг хүний намыг бүртгүүлэхээр хандсан ч Улсын дээд шүүх мөн л хүсэлтийг хүлээж аваагүй билээ. Улс төрийн намын тухай хуулийн аравдугаар зүйлд зааснаар намын гишүүдийн тоо 801-ээс дээш байх шаардлагыг хангаагүй учраас дээд шүүх бүртгэхээс татгалзсан юм. 800 хүн бүрдүүлж чадахгүй учраас нэг хүний нам гэх нэр өгөөд ч болов улс төрийн амьдралд нэг хүнтэй нам байгуулж оролцохыг хүссэн түүний мөрөөдөл мөн л талаар боллоо.
Хааныхаа нэрээр улс төр хийж, порно сайт нээхийн тулд нам байгуулах гэнэ
Их Эзэн Чингис хааны нэрээр нэрлэсэн “Чингис хаан” нам байгуулснаа ИЗИС-ийн захирал Д.Ням-Осор зарлаж, Улсын дээд шүүхтэй заргалдаж байсан нь мөн л саяхных. Тэрбээр, шаардлага хангаагүй хэмээн бүртгэхээс татгалзсан хүсэлтийг хууль бус гэж үзээд давж заалдаж явсан. Одоогоор ялагдлаа хүлээн зөвшөөрч нам гүмхэн байгаа ч тун удахгүй намынхаа нэрийг бариад дахиад л шүүхээр явах сурагтай.
Үргэлжлэлийг энд дарж уншина уу
Манай сайт танд таалагдаж байвал LIKE хийгээрэй. Танд баярлалаа.