-“Латиф” сан 2015 оныг яагаад “Сайн үйлсийн жил” болгон онцолсон юм бэ?

-“Латиф” сан байгуулагдаад багагүй хугацаа өнгөрч байна. Өдгөө энэ санд санаа сэтгэл нийлсэн хорь гаруй уран бүтээлчид ажилладаг. Үүнээс зууны 90 хувь нь залуучууд. Тэр утгаараа залуучуудын төлөвшил, хүмүүжлийн талын ач холбогдолтой гэж үзэж “Сайн үйлсийн аян”-ыг эхлүүлээд байгаа юм.Өнөөдөр нийгэмд бусдын тусламж хэрэгтэй байгаа олон хүмүүст өөрсдийн боломжоор туслахаар энэ ажлыг эхлүүлээд гурав, дөрвөн сар боллоо. Мэдээж одоо үр дүнгийн талаар ярих цаг нь бишээ. Он дуустал явагдах ажил учраас өнөөдөр эртдэнэ. Энэ бол бидний хувьд шинэ ажил. Хүнд тусална гэдэг бодож байснаас ч амаргүй зүйл бололтой. Цаг үеэ дагаад ч тэрүү их өөр болчихсон юм шиг бодогдлоо. Тусламж хэрэгтэй хүмүүс маш их, үнэхээр их байдаг юм байна. Тэр дотор үнэн ярьж байгаа хэсэг байхад зөвхөн мөнгө санхүүгийн зорилготой орж ирэхтэй ч таарлаа. Энэ болгонд “Латиф” сангийнхан туршлагажиж байна.
Өнгөрсөн саруудад манай сангийнхан Багахангай дүүргийн зорилтот бүлгийн хүүхдүүдэд туслах ажлыг хийлээ. Мэдээлэл асар хурдтай тарах болсон энэ үед хил хязгаараас үл хамааран, сэтгэл санаагаар нэгдэж болж байна. Бидний эхлүүлж буй ажлыг интернэтээс харсан Солонгос улсад ажиллаж амьдарч байгаа Ургамал бүсгүй тусламжийн хувцас илгээснийг бид зуучилж, Багахангайн хүүхдүүдэд өглөө. Нүдэнд нь баярын оч гэрэлтэх багачуудыг харахад сайхан байлаа. Ер нь манай сангийн үйл ажиллагааг дэмжиж Солонгос, Америк, Орос, Европын орнуудад ажиллаж амьдарч байгаа монгол залуучууд их хандаж байгаа нь ажиллах урам зоригийг нэмж байна. Түүнчлэн Налайх дүүргийн 10 жилийн сургуулийн багш Оюунбилэгийн охин, Отгонбаатарын Анужинд зориулсан “Бяцхан зүрхний төлөө” хандивын тоглолтыг Улаанбаатар паласт маш амжилттай зохион байгууллаа. Анужин охин одоо Солонгос руу эмчилгээндээ явахаар боллоо. Мөн Багахангай дүүргийн Бямбаа гэж хүү нүдний болор шилжүүлэх хагалгаанд орох шаардлагатай байгаа юм. Чавхаар тоглож байгаад хараагүй болсон хүүг хагалгаанд оруулахаар бэлтгэж байна. Ийнхүү Багахангай дүүргийн удирдлагуудтай хамтран ажилласан бол энэ дөрөвдүгээр сард Налайх дүүрэгт ажиллахаар болж байгаа юм. Тус дүүргийн “Эрдмийн оргил” сургуулийн захиргаа, нийгмийн ажилтан багш нар санал тавьж, сайн үйлсийн аяны ажил Налайх багачуудад хүрэх гэж байна.

-Аливаа хүн хэрэгцээгээ бүрэн хангаад, үлдсэнээ сайн үйлс, буяны ажилд хандивладаг гэж зарим хүмүүс ойлгодог доо?

-Мэдээж бэрхшээл таарч байна. Сая гэхэд зохион байгуулахаар төлөвлөж, сар гаруй хугацаанд бэлтгэсэн хандивын тоглолт маань цуцлагдлаа. Цаг хугацааны хувьд монголын уламжлалт том баяр цагаан сартай таараад үзэгчид хангалттай цугласангүй л дээ. Даанч нөгөө талын хүмүүс ойлгохгүй, эцэстээ маргаанаар дууслаа. Гэхдээ бидний хийж байгаа үйлс цагаан болохоор шантрахгүй ээ. Өнөөдөр хүмүүст фейсбүүкт бичсэн постоор өнгөц харж болохгүй л дээ. Үнэндээ хандивын тоглолт зохион байгуулна гэдэг амаргүй болохыг олон уран бүтээлчид үзсэн.Олон янзаар хийгээд шатаж үзлээ, хэрэлдэж маргаж үзлээ. Энд би анхных нь биш. Минийхээр энд хэн нэгийг хардах биш яаж үр дүнтэй тоглолт хийж, хэрэгтэй хүндээ өгөөжтэй байх вэ гэдгийн төлөө л ажилламаар байгаа юм. Тэрнээс нэг нь мөнгөө бодож тоолоод л, нөгөөх нь тоглолтын тасалбараа борлуулах гэж гүйгээд байвал үр дүн гарахгүй ш дээ.
Энэ бол манай хамт олны эх оронч сэтгэлгээ гэж би ойлгож байгаа. Энэ ажлыг эхлүүлснээрээ амьдралыг би бас нэг өөр өнцгөөс харж байна. Өвчтэй зовлонтой, гэр оронгүй, сургууль соёлд явах хувцасгүй хүүхдүүд хэдэн зуун мянгаараа байгааг хараад өр өвдөж байна. Өнөөдрийн энэ хэцүү цагт бие биедээ туслаж, хамтдаа аз жаргалтай эх орондоо амьдарцгаая л даа. Амьдралд хэцүү зүйл олон байхад нэрэлхүү зандаа хөтлөгдөөд юу ч болоогүй юм шиг явж болохгүй биз дээ. Тиймээс манай сангийн хамт олонтой хамтран ажиллаарай, дэмжээрэй, зөвлөлдөөрэй гэж санал тавьж байгаа юм. Олны хүч оломгүй далай гэдэг. Би чинь дуу хөгжим, тайз л гэж явснаас нийгэмд хандсан ийм том ажлыг анх удаа л хийж байгаа хүн. Тэр утгаараа алдаа оноо гарч байгааг үгүйсгэхгүй. Гэхдээ бэрхшээлээс айж, болино гэж бодохгүй байгаа. Харин ч нийгэмд, хүмүүст хандсан илүү том ажлыг хийхсэн гэж мөрөөдөж байна.

-Байзада хүмүүсийн эмзэг сэдвийг хөндөж, тоглолт хийлээ гэж шүүмжлэх хүмүүст ямар хариулт өгөх вэ?

-Эргэлзээд, хардаж байгаа хүмүүст энэ ажлын тайлангаа мэдээллийн хэрэгслэлээр албан ёсоор тавина гэж бодож байгаа. Би бол монголд өөрийн гэсэн орон зайтай, хийсэн бүтээлтэй хүн. Миний аав Монголын урлагт бүх насаа урлагт зориулсан уран бүтээлч. Монголын урлагийн сүүлийн 50 жилийн түүхэнд Нурбулан, аав бид гурвын түүх багтана гэж би ойлгодог. Миний дуунуудыг үе үеийн дуучид, залуучууд дуулж байна. Би дахиад шинэ, шинэ цомгийнхоо дуун дээр ажиллаж байна. Яалт үгүй цаг хугацаатай уралдахаас өөр аргагүй цаг үед би амьдарч байгаа улс. Яахав шүүмжилж болно ш дээ. Би шүүмжлэлийг хүлээж авна. Гэхдээ нэр хүндэд халдаж болохгүй. Миний ард ажлаа хийж буй энэ олон залуусын итгэл сэтгэлийг унтрааж болохгүй биз дээ.
Та, би бүгдээрээ гэрээсээ гараад хүнд туслах гээд үзье л дээ. Ингээд явахаар ямар их бэрхшээл таарна гээч. Компьютер харж суугаад, сөрөг коммент бичиж байгаа хүн ойлгохгүй. Саяхан бид нарт үнэхээр харамсалтай зүйл тохиолдлоо. Багахангай дүүргийн бөөрний дутагдалтай залууд туслахаар болоод байсан юм. Гэтэл бурхан болчихлоо. Тэгсэн ээж нь “Байзадагийн хамт олон хаалгыг минь тогшин өвчтэй хүүг маань зорин ирж, хэд хоногийн ч болов нас хайрласанд баярлалаа” гэж хэллээ. Энд мөнгө ямар ч хамаагүй. Сэтгэл бас дахин сэтгэл. Хүнд тус болох гээд мөнгөө өгч чадаагүй тохиолдол гарч байна, нуугаад яахав. Жаахан хойшилсон, хэлсэн хугацаандаа амжаагүй байж болно ш дээ. Машин ч гэсэн явж байгаад мөргөлдөөд шатдаг биз дээ. Эрсдэл хаа сайгүй байна. Гол нь туслах гээд явж байгаа сэтгэл л хамгийн чухал гэдгийг бид нар ярилцаж байгаа. Богинохон хугацаанд их хашир суулаа. Миний тухай элдвээр хэлж бичсэн байна лээ. Даанч надад хэрүүл хийх зав алга. Би хэвлэлээр шүүрэн шанага болтлоо хэлүүлж бичүүлж үзсэн хүн болохоор тоодоггүй юм.

-Сайн үйлсийн аян “Латиф” санд ямар сайн үйлсийг авчирч байгаа юм бэ?

-Энэ бол сангийн хувьд гадаад орнуудтай харилцаа тогтоох боломж гэж харж байгаа. Биднээс тусламж авсан хүмүүс эргээд сангийн үйл ажиллагаанд дэмжлэг үзүүлэхийг хүсч байна. Хүмүүсээс сангийнхаа хандивын тоглолтыг хийгээч, туслая гэсэн саналыг хүртэл ирүүлж байгаад баярлаж байна. Сайн санааны үзүүрт тос гэж үнэн юмаа.

-Ярилцлага маань өндөрлөж байна. Сүүлийн асуултыг танд үлдээж байна?

-Баярлалаа. Мэдээж төлөвлөсөн ёсоор энэ жилдээ сайн үйлсийн аяны ажлаа хийнэ. Бидний эхлүүлсэн ажлыг дэмжин бүтэн жилийн хугацаанд хамтран ажиллах Сэр-Од захиралтай “Алтан жирэм” ХХК, Ням-Очир захиралтай “Оюут констракшн”, Өгөөж компанийн Tamek бренд, Мөнх-Оргил даргатай Орхон аймгийн Нийгмийн ардчилал оюутны холбоо, Хүүхдийн ордон, Тусгаар тогтнолын ордон, Улаанбаатар чуулгынхан,Улаанбаатар паласе болон хэвлэл мэдээллийн байгууллагуудад үнэхээр их баярлалаа. Бидний эхлүүлсэн сайн үйлсийн аян Монгол орны дөрвөн зүг, найман зовхист хүрч олон хүнийг баярлуулнаа гэж хэлмээр байна. Үүнээс гадна энэ намар аавын маань 70 насны ой тохиож байгаа. Наурызийн баяраар АСА циркийн захирал Пүрэвбадам эгч надтай болон ээжтэй маань утсаар ярьсан. Циркээс нэг өдрийг Латиф агсныг дурсах өдөр болгож байгааг дуулгахад бид үнэхээр их баярласан. Тэгэхээр энэ асар том ажлын бэлтгэлийг эхлүүлээд байгаа юм. Тэр үеэр эрдэм шинжилгээний хурал зохион байгуулж, өөрийнхөө бичиж байгаа аавынхаа тухай дурсамж номыг олныг хүртээл болгоно.

Эх сурвалж: www.chingis.mn