Гадаадын од яах вэ, цэвэрлэх байгууламжаа засъя

Нийгэм ・Нийтэлсэн: Мэргэн охин ・ 2015 06 сар 03 ・ 1

-Гадаадын оддыг урьж хэдхэн цаг дуулуулж, бүжиглүүлэхэд тэрбум гаруйг цацах гэж буй Засгийн газрыг “баян” гэхээс өөр арга алга-

Нийслэлчүүдийн бохирыг цэвэршүүлдэг байгууллага элэгдэлд ороод өнөө маргаашгүй аваарын засвар хийх болчихоод байхад манай Засгийн газар мөнгөтэй хүн шиг цамаан загнаж, хэдэн төгрөгөө юунд яаж үрэхээ мэдэхгүй аашилж байна. Үндэсний их баяр наадмын үеэр гадаадын алдартай оддын тоглолт зохион байгуулах талаар төлөвлөгөөнд тусгасан ч чухам хэнийг урих нь тодорхойгүй байгаа аж. Энэ асуудал тодорхой болсны дараа Ерөнхий сайд мэдээлэл өгнө хэмээн наадмын комиссынхон хэлж байх юм.

Гадаадын одыг урьж тоглуулах зардалд нэг тэрбум төгрөг цацна гэх мэдээлэл хөврөх.Гэтэл үүгээр нийслэлчүүдийг бохироос салгадаг байгууллагын аваарын засварыг бүрэн хийчих хэмжээний мөнгө. Цэвэрлэх байгууламжийг шинээр барихад шаардагдах санхүүжилтийн дүнгийн талаар гурван дарга гурван өөр тоо хэлсэн. Үүнээс өндөр дүнтэй нь дүйцэхүйц мөнгөөр шоу хийх гэж байна шүү дээ.

Монгол түмэн жилдээ ганц удаа Төрийн их баяр наадмаа тэмдэглэдэг учир их мөнгө зарлаа, цацлаа гэж хэвлэлээр тэр бүр шүүмжлээд байдаггүй. Тиймээс жил бүрийн наадмын төсөв өсч ирсэн. Энэ жилийнх 2.7 тэрбум гаруй төгрөг болж өмнөх оныхоос мөн л нэмэгдэж. Үүн дээр гадаадын оддыг урьж хэдхэн цаг дуулуулж, бүжиглүүлэхэд нэг тэрбум гаруйг цацах гэж буй Засгийн газрыг “баян” гэхээс өөр арга алга. Эдийн засаг хүндхэн, ард иргэдийн амьдрал өдрөөс өдөрт хүндэрч, инфляци, өргөн хэрэглээний барааны үнэ тэнгэрт хадаж буй бодит нөхцөл байдлыг энэ удаа дурьдахаа больё.

Харин гадаадын одоо авчрахаа болиод оронд нь төв цэвэрлэх байгууламжид яаралтай засвар хийх шаардлагатай байгаа мөнгө болох 300 сая ам.доллар буюу 600 тэрбум төгрөгийг шийдэжөгөөч гэх гэсэн юм. Нийслэлчүүд гурав хоног бохиртойгоо холилдох, эсвэл Туул гол руу бохироо цутгах гэсэн хоёр сонголттой нүүр тулаад байгаа. Үүнийг холбогдох албаныхан шийдвэрлэхээр хэлэлцэж буй ч нийслэлчүүд 72 цаг магадгүй түүнээс ч удаан хугацаагаар бохиртойгоо холилдох боломжгүй учраас хатан Туул руу урсгах зам л үлдээд байгаа гэх.

Энэ хоёр замын алийг нь ч сонгосон бай засварын ажлаа зургаадугаар сарын 10 гэхэд буюу ирэх долоо хоногт эхлүүлэхээр холбогдох албаныхан төлөвлөөд байна. Төв цэвэрлэх байгууламжийг 1963 онд байгуулахдаа Улаанбаатар хотод 600 мянган хүн ам амьдарна хэмээн тооцож, тэдгээрийн ахуйн бохирдолтой усыг цэвэршүүлэн Туул гол руу нийлүүлж байхаар төлөвлөж байжээ.

Харин өдгөө нийслэлийн 1.2 сая хүн амын ахуйн болон үйлдвэр, аж ахуйн нэгжээс гарч буй хэт их бохирдлыг цэвэрлэж, эцэстээ ачааллаа дийлэхгүй ийн тартагтаа тулаад байна. Цэвэрлэх байгууламжид 1976, 1989 онд өргөтгөл хийж, технологийн шинэчлэл хийснээс хойш өнөөг хүртэл ажиллаж ирсэн нь өнөөдрийн нөхцөл байдлыг бий болгоод буй юм.

Үргэлжлэлийг эндээс уншина уу

Манай сайт танд таалагдаж байвал LIKE хийгээрэй. Танд баярлалаа.