Улсын төсвийн хөрөнгө оруулалтаар хэрэгжсэн ч гэрээний үлдэгдэл санхүүжилтээ бүрэн авч чадаагүй, мөн 2014 оны төсөвт тусгагдсан 80 хувиас дээш гүйцэтгэлтэй хэрэгжсэн ч үлдэгдэл мөнгөө авч чадаагүй аж ахуйн нэгжүүдийн санхүүжилтийг Засгийн газрын өрийн бичиг Вексель гаргаж санхүүжүүлэхээр болоод байсан.

Энэ ажил өчигдрийн Төсвийн байнгын хороон дээр очоод гацчихлаа. Тодруулбал, Засгийн газраас 2008-2014 онд ажил гүйцэтгэсэн, ингэхдээ гүйцэтгэл нь 80-аас дээш хувь байгаа 81 аж ахуйн нэгжид 92.5 тэрбум төгрөгийн хөрөнгийг нь шийдэж өгөхөөр болоод байв. Улмаар дээрх аж аж ахуйн нэгжүүд харьяа яамдаа хүсэлт гаргасны үндсэн дээр вексель бичиж эхлээд байсан. Өөрөөр хэлбэл, төр арилжааны банкуудаас жилийн таван хүүтэй мөнгө зээлэн хувийн хэвшилд гүйцэтгүүлсэн ажлынхаа санхүүжилтийг төлөх гэж байсан ч УИХ-ын Төсвийн байнгын хорооноос судлах шаардлагатай гэж үзэв.

Төсвийн байнгын хорооноос ээлжит бус чуулганы хэлэлцэх асуудлын дараалалд ороогүй векселиэр санхүүжүүлэх төсөл, арга хэмжээнүүдийн санхүүжилтийн асуудлаар ажлын хэсэг байгуулах шаардлагатай гэх. Энэ нь нэг талаараа зөв байсан. Ээлжит бус чуулганаар хэлэлцэх асуудлын жагсаалтыг УИХ-ын дарга захирамж гаргаж, баталсан. Захирамжид багтаагүй асуудлыг хүч түрэн оруулж ирж, хэлэлцүүлэх эрх гишүүдэд байхгүй. Тэгээд ч 2014 оны төсвийг батлах үеэр тухайн үеийн Ерөнхий сайд Н.Алтанхуяг "авлигажсан" төсөв болох нь гээд 230 гаруй обьектын төсвийг царцаасан. Өөрөөр хэлбэл, нэг тэрбум төгрөгийн өртгөөр барих ёстой барилгыг хэд дахин өндөр үнээр барихаар төсөв батлуулж байсан жишээ олон байсан. 

УИХ-ын 7-р тогтоол, Засгийн газрын 282-р тогтоол гарч, 2008-2014 оны Төсвийн тухай хуульд тусгагдаж, тухайн төсвийн жилд бүрэн санхүүжигдээгүй, гэрээний үлдэгдэл төлбөр бүхий  нийт235 төсөл, арга хэмжээний ажлын санхүүжилтийг вексел буюу өрийн бичгээр баталгаажуулахаар шийдвэрлэсэн байдаг. Товчхондоо, царцаасан гэх тодотголтой обьектуудын санхүүжилтийг дээрх тогтоолуудаар шийдвэрлэх байсан юм. Үүнээс дээр дурьдсан 81 аж ахуйн нэгжид өрийн бичгийг бичиж, холбогдох гүйцэтгэгч компаниудад хүлээлгэн өгөөд байж.

Энэ ажлыг гацаасанд Сангийн яам болоод УИХ-ын зарим гишүүн бухимдалтай байна. Тухайлбал, УИХ-ын гишүүн Р.Амаржаргал “Процедурын, агуулгын хувьд ч энэ асуудал нэг л болохгүй байна. Ядаж ном ёсоор нь явуулахын тулд хэд хоногийн өмнө УИХ-ын гишүүдэд тараагдаж танилцах боломжоор хангах ёстой. Дахиад хүч түрсэн асуудал болох вий. Өчнөөн аж ахуйн нэгж байгууллагууд одоо болтол санхүүжилтээ авч чадаагүй. Өнгөрсөн оноос хойш санхүүжилтгүй зогссон аж ахуйн нэгжүүд олон байна. Эдийн засаг хаа хаанаа түгжигдчихлээ гээд л байдаг. Үүнийг шийдэх нэг арга нь вексель юм, векселиэр дамжуулж санхүүжилт хийе гэсэн. Ялангуяа хөдөө орон нутагт үйл ажиллагаагаа явуулсан аж ахуйн нэгж, байгууллагууд ажлаа хийчихсэн, мөнгөө авах тухай яригдаж байгаа үед асуудалд бид гоомой хандаж болохгүй” гэлээ.

Үргэлжлэлийг эндээс уншина уу