УДБЭТ-ын балетын гоцлоочид болон бүжигчид “NOMADIC BALLET PRODUCTION” байгуулснаа албан ёсоор зарлаж анхны уран бүтээлээ жил бүрийн 4-р сарын 29-нд болдог Дэлхийн бүжгийн өдрийг тохиолдуулан үзэгчдэдээ өргөн барих гэж байна.

     Монгол улсад балет буюу бүжгэн жүжгийн урлаг үүсч, хөгжсөн 60 жилийн хугацаанд эх орондоо төдийгүй дэлхийд нэр хүндтэй олон бүжигчид төрсөн билээ. Харин анхны мэргэжлийн балетын продакшн байгуулагдлаа хэмээн тодотгож байгаагийн учир нь театрын сонгодог уран бүтээлээсээ давж, өөрсдийгөө сорьж, илүү ихийг бүтээн туурвих зорилготой, эрч хүчтэй, авъяаслаг залуус нэгдэн балетын урлагийн Монгол улсад хөгжиж ирсэн түүхэн сонгодог замналд шинэ уур амьсгал, орчин үеийн хэмнэл нэмэхээр нэгдсэнийг та бүхэндээ дуулгаж байгаадаа таатай байна.

    “NOMADIC BALLET PRODUCTION” нь дэлхий дахины орчин үеийн бүжгийн хувьсал, шинэчлэлийг эх орондоо таниулах, дэлгэрүүлэх, цаашлаад орчин үеийн бүжгээр дэлхийн тавцанд гарах зорилготой юм. Тэд анхны тоглолтоо “SENTIMENT” буюу “Мэдрэхүй” хэмээн нэрийдсэн нь Монголын балетын түүхэнд оруулж буй шинэ салхи, шинэ өнгө төрхөө илэрхийлсэн хэрэг буй за.

    “МЭДРЭХҮЙ” тоглолт нь неоклассик, сонгодог болон модерн хосолсон үзүүлбэрүүд болон Майкл Жексоны дуунд сонгодог бүжгийг тусгайлан дэглэсэн шоу үзүүлбэрүүд гэсэн хоёр хэсэгтэй бөгөөд авъяаслаг залуу уран бүтээлчид маань орчин үеийн бүжгийн хэлээр үзэгчдэд юу хэлэхийг, юу ойлгуулахыг хүсэж байгааг, түүнчлэн монголын балетын бүжигчдийн чансаа ямархан зэрэгт хүрснийг Дэлхийн бүжгийн өдрөөр мэдэрч болох нь ээ. Ингээд балетын урлагийг дэмжигч эрхэм та бүхнийг 4-р сарын 29-ний 19:00 цагт “Corporate And Convention Centre”-ийн концертын танхимд урьж байна.

Тасалбарыг: www.TICKET.mn
Лавлах утас: 9888 6565