“МАН улсаа, ард түмнээ бодно оо, энэ удаа”

Улстөр ・Нийтэлсэн: Отгонхүү ・ 2014 11 сар 25

Ерөнхий сайд Ч.Сайханбилэг өнгөрөгч даваа гарагт УИХ-д суудалтай намуудад хамтран ажиллах санал хүргүүлсэн билээ. Улс орны эрх ашиг, эдийн засгийн хямралт байдал, уул уурхайг гацаанаас гаргахын тулд парламентад суудалтай улс төрийн намууд бүгд хамтарч ажиллах шаардлага үүсч байна хэмээгээд парламентад суудалтай нам эвслүүд энэ эрх ашгийн төлөө хамтдаа явах ёстой гэсэн юм.

Тэр дундаа Монгол Улсын хөгжлийг тодорхойлж ирсэн, АН, МАН хэмээх хоёр том улс төрийн хүчин хэрхэн хамтарч ажиллахаас цаашдаа бид хөгжих үү, эс хөгжих үү гэсэн замыг сонгох болоод байгаа нь үнэн. Ерөнхий сайд нь солигдлоо ч өмнөх шигээ МАН сөрөг хүчин боллоо гээд хэзээ ч ажил явахгүй гэдэг нь өнгөрөгч хоёр жилийн сандал суудлын хэрүүлээс харагдаж байгаа юм. Ойрын өдрүүдэд МАН гуйлгахын гайхамшиг болж, АН гуйхын гутамшиг болсон дүр зураг харагдаж байгаа. Ч.Сайханбилэг сайдын хамтран ажиллах саналыг МАН-ынхан хүлээж авах эсэхээ хоёр өдөр хуралдаж ярилцав.

Удирдах зөвлөлөө хуралдуулж, мөн МАН-аас төр засгийн өндөр албан тушаал хашч байсан эрхмүүдээс бүрдсэн Зөвлөхүүдийн танхимаараа уг асуудлыг хэлэлцэж, МАНАН болж ажиллах нь зөв гэдэгт байр сууриа нэгтгэсэн чимээтэй. Ингэснээр ирэх хоёр жилд МАНАН-гийн Засгийн газар байгуулагдаж мэдэх нөхцөл байдал үүслээ. “МАН улсаа, ард түмнээ бодно оо, энэ удаа” гэж тэдний олонхи үзэж байсан юм.

МАНАН хэрвээ байгуулагдвал МАХН-МҮАН-ын “Шударга ёс” эвсэл гэрээгээ цуцалж сөрөг хүчний байр сууринаас хандана гэдгээ илэрхийлсэн. Гэхдээ цөөнхийн эрх ашиг биш улс орны эрх ашиг, төрийг удирдаж байсан улс төрийн намуудын зөвшилцөл юу юунаас чухал учраас “Шударга ёс” эвслийн улстөржилт одоогоор жин дарах нь юу л бол. Засгийн газрын ерөнхий чиг зурагдаж, улс төрийн маргаан эцэс болох хугацаа ч дөхөж байна. Дараагийн нэг асуудал бол Ч.Сайханбилэгийн танхимд хэн хэн орж ажиллах вэ гэдэг асуудал.

Улс төрийн нам эвслүүд ямар хариу өгөхөөс шалтгаалан танхимын дүр зураг гарах ч сайд болох сонирхлоо илэрхийлсэн, мөн өмнөх танхимд ажиллаж байгаа сайдуудаас хэн хэн нь үлдэх вэ гэсэн таамаг гарч эхэлжээ. Тэр дундаа олонхи бүрдүүлэх эрх авсан АН дотор фракци дотроо сайдад өрсөлдөх, өөрт хэрэгтэй суудлаа хамгаалж үлдэх гэсэн сонирхол ч багагүй дуулдаж байна. Шинэчлэлийн Засгийн газарт ажиллаж байсан сайдуудаас суудалдаа үлдэх хүмүүсийн нэрс эхнээсээ тодорхой болж эхэллээ.

Тухайлбал, ХАХНХ-ын сайд С.Эрдэнэ суудлаа өгөхгүй гэдгээ мэдэгджээ. Тэрбээр, “Шонхор” фракцийг даргалдаг болсон, Ч.Сайханбилэгийг сайд болоход томоохон үүрэг гүйцэтгэсэн фракцийн тэргүүн учраас энэ суудлаа өгөхгүй хэмээсэн байна. Мөн тус фракци Уул уурхай, эрчим хүчний сайдын суудлыг авах саналаа гаргасан бөгөөд энэ суудалд УИХ-ын гишүүн, БОХХАА-н байнгын хорооны дарга Г.Баярсайхан, Уул уурхайн сайд асан Д.Ганхуяг нар фракци дотроо өрсөлдөж байна.

МҮДН фракцийн гишүүн Батлан хамгаалахын сайд Д.Бат-Эрдэнэ суудалдаа үлдэх юм байна. Мөн УИХ-ын гишүүн Д.Ганбат, Г.Батхүү, А.Бакей нарын гишүүд сайд болох сонирхлоо нам дээрээ илэрхийлжээ. Г.Батхүү гишүүний хувьд албан тушаалаас удтал хойшоо суусан одоо боллоо, миний хувьд энэ Засгийн газарт бүх амбийцаараа өрсөлдөнө гэдгээ ил тод илэрхийлсэн сурагтай. Мөн Ерөнхийлөгчийн зүгээс гурван хүнийг оруулж ирсэн аж.

Гадаад харилцаа, эдийн засгийн хамтын ажиллагааны сайдад Л.Пүрэвсүрэнг, Соёл спорт, аялал жуулчлалын сайдад Хэвлэл мэдээлэл хариуцсан зөвлөх А.Ганбаатарыгаа, Хууль зүйн сайдад Ерөнхий прокурор Д.Дорлигжавыг нэр дэвшүүлсэн бөгөөд Д.Дорлигжавт Хууль зүйн яамыг, Л.Пүрэвсүрэнд Гадаад харилцааг өгч болох юм гэсэн тохироо хийгдсэн байна. Энэ дундаас Соёл спорт аялал жуулчлалын яам дээр багагүй өрсөлдөөн өрнөжээ. Энэ суудал бол МоАХ фракцийнх. МоАХ фракцийн тэргүүн Х.Баттулга танхимд ажиллах бүх сайдуудаа гаднаас оруулж ирнэ гэсэн зарчим баримталж байгаа.