Улстөр
・Нийтэлсэн:
Хөхөө
・
2014 10 сар 01
УИХ-ын намрын чуулган өчигдөр нээлтээ хийлээ. Энэ удаагийн намрын чуулганаар олон чухал асуудлыг хэлэлцэж, батлах учиртай. Мөн Засгийн газрын бүтэц, бүрэлдэхүүнийг өөрчлөх, төмөр замын бодлого, төсөв, мөнгөний бодлого зэрэг хүлээлт үүсгэсэн асуудлуудыг хэлэлцэнэ.
Өнөөдрийн чуулганы хуралдаанаар хэлэлцэх анхаарал татсан асуудал бол яах аргагүй төмөр замын бодпогын асуудал болон Засгийн газрын гишүүнийг огцруулах асуудал юм.
Төрөөс төмөр замын тээврийн талаар баримтлах бодлогын хэрэгжилтийг хангах зарим арга хэмжээний тухай УИХ-ын тогтоолын төслийг хэлэлцэх эсэх асуудлыг үргэлжлүүлэн хэлэлцэнэ. Төмөр замын царигийн асуудлыг өнгөрсөн хаврын чуулган болон байнгын хороогоор хэд хэдэн удаа хаалттай хэлэлцэж байсан ч тодорхой үр дүнд хүрч чадаагүй байсан юм. Өнгөрсөн наймдугаар сайрд хийсэн БНХАУ-ын дарга Си Жиньпиний айлчлалтай холбогдуулан уг асуудлыг цаашид үргэлжлүүлэн хэлэлцэнэ гэж зарим эх сурвалжууд мэдээлж байгаа. Ямартаа ч чуулганы нэгдсэн хуралданаар уг асуудлыг хэлэлцэн, шийдэх юм.
Мөн өнөөдрийн чуулганаар Эдийн засгийн хөгжлийн сайд Н.Батбаярыг огцруулах эсэхийг хэлэлцэнэ. Өнгөрөгч тавдугаар сарын 29-ний өдөр МАН-ын дарга, УИХ-ын дэд дарга М.Энхболд, УИХ дахь МАН-ын бүлгийн дарга С.Бямбацогт нар Эдийн засгийн хөгжлийн сайд Н.Батбаярыг ажилдаа хариуцлагагүй ажиллаж, бондын мөнгийг үр дүнгүй зарцуулсан хэмээн үзэж түүнийг огцруулах саналыг УИХ-ын дарга З.Энхболдод өргөн барьсан байдаг.
Өнгөрсөн хаврын чуулганаар түүнийг огцруулах асуудлыг хэлэлцэх явц байнгын хороо болон чуулган дээр таван ч удаа хойшлогдож байсан юм. Харин УИХ-ын намрын ээлжит чуулганы өнөөдрийн хэлэлцэх асуудлын жагсаалтад Н.Батбаяр сайдыг огцруулах эсэх асуудлыг багтаажээ.
Манай сайт танд таалагдаж байвал LIKE хийгээрэй. Танд баярлалаа.