Улстөр
・Нийтэлсэн:
Хөхөө
・
2014 10 сар 01
Намрын чуулганаар хэлэлцэх асуудлын эхний гуравт эрэмбэлэгдээд байсан Эдийн засгийн хөгжлийн сайд Н.Батбаярыг огцруулах эсэх асуудлыг өнөөдөр чуулганы эхэнд хассан. Харин энэ асуудлыг цаг алдалгүй хэлэлцэх ёстой гэсэн байр суурийг УИХ дахь МАН-ын бүлгийн дарга С.Бямбацогт илэрхийллээ. Тэрээр "УИХ-ын чуулганы дэгийн тухай хуульд зааснаар Засгийн газрын гишүүнийг огцруулах асуудлыг долоо хоногийн дотор байнгын хороо хэлэлцэж санал дүгнэлт гаргадаг. Харин энэ санал дүгнэлтийг УИХ-ын чуулганы нэгдсэн хуралдаанаар долоо хоногийн дотор хэлэлцэх ёстой. Эдийн засгийн хөгжлийн сайд Н.Батбаярт хариуцлага тооцох асуудлыг МАН-ын бүлгийн гишүүдээс УИХ-д өнгөрсөн тавдугаар сарын 29-нд тавьсан. Гэтэл хэлэлцэлгүй хойшлуулсаар хаврын чуулганыг завсарлуулсан. 14 хоногийн дотор хэлэлцэх ёстой асуудлыг 120 хоног өнгөрчихөөд байхад хэлэлцдэггүй нь ямар учиртай юм бэ. Өнөөдрийн УИХ-ын чуулганы нэгдсэн хуралдааны хэлэлцэх асуудлын дараалалд багтаасан байсан ч хасчихлаа. Хариуцлага тооцох асуудлаа хэзээ ярих вэ. Энэ асуудлыг хэлэлцүүлж өгөөч" гэсэн хүсэлтийг УИХ-ын дарга З.Энхболдод тавьсан юм.
Манай сайт танд таалагдаж байвал LIKE хийгээрэй. Танд баярлалаа.