Дараагийн Ерөнхий прокурор хэн болох вэ

Улстөр ・Нийтэлсэн: Отгонхүү ・ 2015 01 сар 06

Шийдлийн Засгийн газар сайдууд, дэд сайдууд болон агентлагийн дарга нараа томилоод байгаа билээ. Харин Төрийн нарийн бичгийн дарга нарын албан тушаалд сонгон шалгаруулалт зарлаад байгаа юм. Эдгээр томилгооноос гадна олны анхаарлыг хамгийн ихээр татаж байгаа нэгэн томилгоо нь дараагийн Ерөнхий прокурор хэн байх вэ гэсэн асуулт...

Улсын Ерөнхий прокурор Д.Дорлигжав ажлаа хүлээлгэн өгч, Хууль зүйн сайдын суудалд суугаад сарын хугацаа өнгөрөх гэж байна. Энэ хугацаанд түүний хуучин суудал “хоосон” хэвээрээ. Оронд нь хэн томилогдох вэ гэсэн асуултын хариу одоо ч тодорхойгүй байгаа юм. Хэдийгээр оронд нь хүн томилогдоогүй ч Ерөнхий прокурорын ажлыг Улсын Ерөнхий прокурорын орлогч Г.Эрдэнэбат хариуцан ажиллаж байна.

Г.Эрдэнэбатыг Ерөнхий прокурор байвал тохирох боломжийн хүн гэх яриа прокурорын байгууллага дунд чих дэлсэж байгаа бөгөөд түүний нэр Ерөнхий прокурорт яригдаж байгаа аж. Мөн түүнтэй зэрэгцэн Нийслэлийн прокурор Б.Бат-Орших болон Ерөнхийлөгчийн хуулийн бодлогын зөвлөх Ч.Өнөрбаяр нарын нэр ч дуулдаж эхэлжээ.

Мэдээж Ерөнхий прокурорт яригдаж байгаа эрхмүүд гурвуулаа хуульч мэргэжилтэй, туршлагатай учраас прокурорууд ихэд ам сайтай байгаа юм байна. Гэхдээ прокурорын байгууллагын ажилчид Г.Эрдэнэбат эсвэл Б.Бат-Орших нарт илүү ам сайтай байгаа талаар эх сурвалж мэдээлсэн юм.

Тэгвэл дараагийн Ерөнхий прокурорт яригдаж байгаа эрхмүүдийн хэн нь хэн бэ?

Улсын Ерөнхий прокурорын орлогч Г.Эрдэнэбат

Г.Эрдэнэбат нь 1994 онд Цагдаагийн дээд сургуулийг хуульч-команд офицероор төгссөнөөс хойш тасралтгүй 20 жил мэргэжлээрээ ажилласан. Шүүхийн тухай багц хуулийг хэлэлцэн батлуулахад, түүний дараа хэрэгжүүлэхэд чухал хувь нэмрээ оруулсан хүн гэж хуулийнхан үздэг юм байна. Г.Эрдэнэбатыг Хууль зүйн сайд асан Х.Тэмүүжин хуулийн сургууль төгссөнөөс хойшхи хугацааны 50 хувийг багшлах ажилд, үлдэх 50 хувийг жинхэнэ талбар дээр нь ажилласан онолын болоод практик туршлагатай хуульч гэж үнэлдэг.