/НИТХ дахь МАН-ын бүлгийн дарга/

-Нэг хувийн татвар иргэдэд төдийлөн хүндрэл болохгүй гэдэг тайлбарыг хотын удирдлагууд хэлж байна. Гэхдээ энэ татвар нийт дүнгээрээ 13-14 тэрбум төгрөг болж, нийслэлийн иргэдэд очно гэдгийг хараахан тооцоолохгүй байх шиг. Бидний зүгээс энэ татварыг батлуулахгүй гээгүй. УИХ анх хууль батлахдаа 0-1 гэж хэмжээ тогтоож өгсөн учраас эдийн засаг хямарсан, иргэдийн худалдан авах чадвар 30-40 хувиар буурсан, инфляци өсчихсөн энэ цаг үед нийслэлийн татварыг тэг хувиар баталъя гэдэг саналыг гаргасан. Гэтэл АН-ынхан сонгууль ойртож байгаа учраас та нар улстөржиж байна гэлээ. Гэтэл хотын дарга өөрөө асуудлыг улстөржүүлээд байна л даа. 

Тиймээс бид санал хураалтад оролцсонгүй. Учир нь иргэдэд гай болохоор зай бол гэдэг шиг өнөөдөр бид иргэдийн амьдралд тус болж чадахгүй байж улам их ачаа үүрүүлэхийн төлөө санал өгөөд сууж чадсангүй. Харин олонхийн нэг хувийн татварыг батлаад алга ташаад, биендээ баяр хүргээд байна лээ. Би үүнийг хувьдаа маш их гайхсан. Нийслэлийн иргэдийн амьдрал өдрөөс өдөрт муудаж байгаа энэ цаг үед иргэдийн төлдөг татварыг нэмнэ гэж шийдвэр гаргачихаад, үүнийхээ төлөө нэг нэгэндээ баяр хүргээд зогсч байх төлөөлөгчидтэй хамт сууж байсандаа гутарч байна. Эцсийн дүндээ нийслэлийнхээ иргэдийн дарамтлах гээд, нуруун дээр нь ачаа үүрүүлэх гээд нэг хувь гэж гар өргөөд сууж байгаа төлөөлөгч нартай хамт сууж санал өгөх ёс суртахуун бидэнд байгаагүй гэж ойлгож болно. 

Татварыг  иргэн төлнө. Өөр хэн ч биш. Гэтэл хотын дарга ярихдаа гаднаас баахан жуулчин ирээд л энэ татварыг төлчихнө гээд байгаа. Бодит байдал дээр манай улсад хэчнээн жуулчин ирж очдог юм. Манай нийслэлд байгаа баар, ресторанаас хэдэн хувь нь үйлчлүүлж байна гэдэг тооцоо судалгаатай байх ёстой. Үнэн хэрэгтээ хотын дарга жуулчдаас жилдээ 13-14 тэрбумын татвар хуримтлуулна гэж одоохондоо худлаа хэлээд өнгөрчих гээд байна л даа. Гэтэл яг бодит байдал дээр өнөөх жуулчид нь 13-14 тэрбумын ердөө нэгхэн хувийг ч бүрдүүлж байж магадгүй шүү. Үлдсэн бүх татварын орлогыг хотын иргэд маань төлнө. 

Гэрийнхээ хажуугийн ресторанаас хоол авч идэхэд өнөөх нь архи, дарс зарах зөвшөөрөлтэй байна. Түүнээс нь авч хэрэглэхэд тухайн иргэн татвараа төлж, үйлчилгээний газар татвар суутгагч болж хувирч байгаа юм. Үүнийг иргэдэд зөв ойлгуулах үүднээс бид ингэж тайлбарлаж яриад байгаа юм л даа. Эрх баригчид бол архи, тамхи шүү дээ гэдэг нэрийн дор татвар гаргаж ирээд байна. Гэхдээ л архи, тамхи иргэдийн нийтлэг хэрэглээний нэг болчихсон шүү дээ. Өнөөдөр нэг хувийн татвар нэмснээр архи, тамхины хэрэглээг хязгаарлана гэдэг бол үлгэр. Мөн энэ татварыг авдаг болсноор нийслэлийн төсөвт нэмэр болно гэж үзвэл бас л тийм гарц харагдахгүй байгаа юм. Бүтэн жилдээ 13-14 тэрбум төгрөгийн татварын орлогыг нийслэлийн төсөвт төвлөрүүлнэ гэж үзэж байгаа.

Үргэлжлэлийг эндээс уншина уу