Нийгэм
・Нийтэлсэн:
Отгонхүү
・
2017 12 сар 01
・ 15
Монгол, Хятадын сэтгүүлчдийн VIII форум 2017 оны арваннэгдүгээр сарын 21-23-нд БНХАУ-ын ӨМӨЗО-ны Хянган аймгийн Рашаант хотноо амжилттай болж өндөрлөлөө.
Энэхүү форумд Монголын талаас МСНЭ-ийн ерөнхийлөгч Б.Галаарид, Монгол Улсын Сэтгүүл зүйн академийн ерөнхийлөгч Ү.Хүрэлбаатар, МСНЭ-ийн ерөнхий нарийн бичгийн дарга С.Алтанцэцэг, МХХ-ийн Удирдах зөвлөлийн дарга Х.Чилаажав, МҮОНРТ-ийн дэд захирал Г.Гэрэл, Өдрийн сонины Ерөнхий эрхлэгчийн орлогч Ж.Сандагдорж, “Монгол ньюс” группийн ерөнхий менежер Б.Баярмагнай, “Монголын сайтын холбооны ерөнхийлөгч Э.Батхүү, Монголын сайтын холбооны дэд ерөнхийлөгч Б.Цоожчулуунцэцэг, "Оллоо" ХК-ийн Гүйцэтгэх захирал Р.Цагаанган, Хяналтын зөвлөлийн дэд дарга Цогбадрал, ETV телевизийн гүйцэтгэх захирал С.Баатарсайхан тэргүүтэй 30-аад хүн оролцсон юм.
Хятадын талаас БНХАУ-ын Төрийн зөвлөлийн ХМА-ны Гадаадад дэлгэрүүлэх газрын дэд дарга Жао Шүнгүе, БНХАУ-ын Төрийн зөвлөлийн ХМА-ны Гадаадад дэлгэрүүлэх газрын Орон нутгийн тасгийн дарга Ли Жяшү, БНХАУ-ын Төрийн зөвлөлийн ХМА-ны Гадаадад дэлгэрүүлэх газрын харилцагч Жү Яньшань, Хятадын Коммунист намын ӨМӨЗО-ны хорооны байнгын хорооны гишүүн, суртал ухуулгын хэлтсийн дарга Бай Юйган, Хятадын Коммунист намын ӨМӨЗО-ны хорооны байнгын хорооны гишүүн, суртал ухуулгын хэлтсийн байнгын орлогч дарга, Сэтгүүлчдийн эвлэлийн ерөнхийлөгч Жөү Чүньже, ӨМӨЗО-ны Ардын Засгийн газрын ХМА-ны дарга Ли Ан, ӨМӨЗО-ны Ардын Засгийн газрын ХМА-ны Гадаад сурталд ухуулгын газрын дарга Үндэсбат тэргүүтэй удирдах албан тушаалтнууд, хятадын сэтгүүлч нарын төлөөлөл оролцлоо.
Форумын үеэр Монгол Улсын Ерөнхий сайд У.Хүрэлсүх илгээлт ирүүлсэн бөгөөд “Хоёр орны харилцан ашигтай хамтын ажиллагаа, иргэд хоорондын эв нэгдэл, ойлголцолд сэтгүүлч нарын гүйцэтгэх үүрэг асар их бий гэдгийг онцолсон байна.
МСНЭ-ийн Ерөнхийлөгч Б.Галаарид энэхүү форумд “Хоёр орны найрамдал, хамтын ажиллагааны өчигдөр, өнөөдөр, хэвлэл мэдээллийн үүрэг оролцоо” сэдвээр илтгэл тавьсан юм. Энэхүү илтгэлд хоёр орны хамтын ажиллагааны талаар онцлоод “Мэдээлэл бол улс орон, ард түмнүүдийн найрамдалт харилцааны нэгэн том гүүр юм. Тиймээс мэдээ, мэдээллийг олж боловсруулах, түгээх үндсэн үүрэгтэй хэвлэл мэдээллийн хэрэгсэл, сэтгүүлчид манай хоёр орны ард түмнүүд бие биенээ илүү сайнаар таньж мэдэх, ойлголцох, харилцах итгэлцэх, ойртон нөхөрлөх үйлсэд нэг чухал үүрэгт гүйцэтгэх болно” гэдгийг цохон тэмдэглэсэн юм.
Энэ үеэр Хятадын Коммунист намын ӨМӨЗО-ны хорооны байнгын хорооны гишүүн, суртал ухуулгын хэлтсийн байнгын орлогч дарга, Сэтгүүлчдийн эвлэлийн ерөнхийлөгч Жөү Чүньже “Ажил хэрэгч хамтын ажиллагаанд мөр зэрэгцэн урагш ахицгаая” сэдэвт илтгэлдээ “Нэгдүгээрт, Хятад, Монгол хоёр улсын иргэд хоорондын ойлголцол гүн зузаан суурь болон бодит хөдөлгөх хүчинтэй байдаг. Хоёрдугаарт, Хятад, Монголын хэвлэл мэдээллийн хэрэгслүүд Иргэд хоорондын ойлголцлыг ахиулахад идэвхтэй үүрэг хариуцлага хүлээх хэрэгтэй. Гуравдугаарт, ажил хэрэгч хамтын ажиллагааг гүнзгийрүүлж, иргэд хоорондын ойлголцлыг ахиулах шаардлагатай” хэмээн онцолж байлаа.
Энэхүү форумын үеэр МСНЭ-ийн Ерөнхийлөгч Б.Галааридаас цөөн асуултад хариулт авсан юм.
-Монгол, Хятадын сэтгүүлчдийн VIII форум амжилттай болж өнгөрлөө. Энэ удаагийн форумын гол онцлог юу байв?
- 2013 онд Ерөнхий сайд Н.Алтанхуяг Бээжин хотноо БНХАУ-ын Төрийн зөвлөлийн Ерөнхий сайд Ли Көцянтай байгуулсан гэрээнд “Талууд Монгол, Хятадын форумыг жил бүр ээлжлэн зохион байгуулна” гэж заасан. Монгол Улс, БНХАУ-ын Гадаад харилцааны яамдын хэвлэл мэдээллийн асуудал эрхэлсэн газрын захирлуудын анхдугаар зөвлөлдөх уулзалт энэ оны эхээр болсон. Монгол Улсын Ерөнхийлөгч Ц.Элбэгдорж, БНХАУ-ын дарга Си Зиньпин нар 2015 онд Улаанбаатарт гарын үсэг зурсан тунхаглалд хоёр улсын хэвлэл мэдээллийн харилцан солилцоог улам идэвхжүүлэх, зөвлөлдөх уулзалт, форум зэрэг хамтын ажиллагааны хэлбэрийг ашиглах талаар тодорхой заалт орсон.
Энэ бүгд манай хоёр орны хэвлэл мэдээллийн салбарын хамтын ажиллагааны хэтийн төлвийг угтан харах боломж олгож байгаа. Энэ удаагийн форумыг БНХАУ-ын ӨМӨЗО-ны Хянган аймгийн Рашаант хотноо зохион байгуулж байна. Эрс тэс уур амьсгалтай, өвлийн аялал жуулчлал түлхүү хөгжсөн энэ нутагт анх удаагаа зохион байгуулж байгаагаараа онцлог. Нөгөө талаар энэхүү форумд маш их ач холбогдол өгч, оролцогчдын тоо нэмэгдсэн байна. Хятадын Төрийн зөвлөлийн хэвлэл мэдээллийн албаны өндөр албан тушаалтнууд, Хятадын төвийн радио, телевиз, ӨМӨЗО-ны бүх аймгуудын хэвлэл мэдээллийн салбарын удирдлагууд оролцож байна.
-Энэхүү форумын үр дүнг та хэрхэн харж байна вэ?
-Монгол, Хятадын сэтгүүлчдийн хамтын ажиллагааг сайжруулах, харилцан ашигтай хамтран ажиллах боломж, гарц шинээр нээгдсэн форум боллоо гэж үзэж байна. Урьд нь бид асуудал ярьдаг байсан бол энэ удаа шийдэл ярьж, хамтын ажиллагааны гэрээнд зарим байгууллагууд гарын үсэг зурлаа. Ер нь жилээс жилд Монгол, Хятадын сэтгүүлчдийн хамтын ажиллагаа сайжирч байгаа. Контент солилцож, мэдээллээ хуваалцаж, фото зургийн үзэсгэлэн гаргаж хамтын ажиллагаагаа сайжирч байна. Цаашид ч энэ харилцаа өргөжин тэлнэ гэдэгт итгэлтэй байна. Монгол Хятадын сэтгүүлчдийн IX форум ирэх онд Монгол Улсад зохион байгуулагдана.
-Хоёр орны сэтгүүлчид хамтран найман удаа форум зохион байгуулжээ. Гол үр дүн нь юу вэ?
-Хоёр орны төрийн бодлогыг тодорхойлж буй гол гол баримт бичгүүдэд манай форумын үзэл санаа сууж чадсан нь хамгийн том ололт. Хэвлэл мэдээллийн хэрэгсэл хооронд, хувь сэтгүүлчид хооронд, сэтгүүлчдийн байгууллага хоорондын шууд харилцаа, хамтын ажиллагаа хөгжихөд ихээхэн түлхэц өгч байна.
- 1
- 2
- 3
- 4
- 5
- 6
- 7
- 8
- 9
- 10
- 11
- 12
- 13
- 14
- 15
- 16
- 17
- 18
- 19
- 20
-
Манай сайт танд таалагдаж байвал LIKE хийгээрэй. Танд баярлалаа.