Улстөр
・Нийтэлсэн:
Отгонхүү
・
2014 11 сар 24
Сарын хугацаанд эзэнгүй байсан засаг өнгөрсөн баасан гарагаас эхлэн эмхэндээ орж байна. МАН-ын тавьсан саналд үндэслэн Засгийн газраа унагасан АН-ынхан энэ удаа улс орны эрх ашгийн төлөө ойлголцож ажиллахыг илүүд үзэж Монгол Улсын 28 дахь Ерөнхий сайдын томилгоог улстөржилт багатайгаар хийлээ. Ингэснээр эдийн засаг бас дахин эдийн засагт анхаарлаа хандуулах шинэ Засгийн газрын зураглал гарч эхэлсэн юм.
Ерөнхийлөгчөөс тамгаа хүлээн авсан Ч.Сайханбилэг сайд өнгөрөгч бямба гарагт анхны хуралдаанаа хийж, өчигдөр танхимаа бүрдүүлэх талаар парламентад суудалтай бүх нам, эвслүүдэд санал урилгаа хүргүүлэв. Ингэснээр Засгийн газрын танхимыг ямар байдлаар бүрдүүлэх вэ, Үндэсний эв нэгдлийн байх уу гэсэн зөвшилцөл бүх шатанд эхэллээ. Энэ долоо хоногийн сүүлээр гэхэд Засгийн газрын танхимын ерөнхий дүр зураг тодорч, шинээр бүрдэх Засгийн газар мэргэжлийн, авралын бас үйл ажиллагаа нь тодорхой үйлдлийн, хяналтын байх эсэх нь шийдэгдэх юм.
Ч.Сайханбилэг сайдын хувьд өмнөх Засгийн газрын гал тогоог сахиж, сайн муу, саар бүхнийг үүрч ирсэн туршлагатай. Тиймдээ ч алдааг нь нарийн олж харан, амжилтаа улам дөвийлгөж ажиллах болов уу гэсэн хүлээлт нийгэмд бий болоод байгааг анхаараасай. Тэрбээр, Ерөнхий сайдын албан тушаалаа хүлээж авахдаа хэлсэн үгэндээ алдаа, амжилтаа онцлон дурьдсан бөгөөд тэр дундаа үйлдвэржилтийг дэмжсэн Засгийн газар байх болно хэмээсэн нь улс төрийн хүрээнийхэн цаашлаад ард түмний талархалд нийцэж байна.
Гүйцэтгэх засаглалын тэргүүний хувьд тэрбээр чамгүй уран илтгэгч гэдгээ ч харууллаа. Түүний хэлсэн үгэнд өмнөх Засгийн газрын тэргүүний ярьж байсан олон зүйл байгаа нь үнэн. Гэвч энэ бүхэн яах аргагүй Монгол Улсын толгойн өвчин болчихсон гэдгийг хаа хаанаа ойлгож байгаа. Оюутолгой, Тавантолгой өнөө маргаашгүй өндийх юм шиг, уул уурхайгаас мөнхийн угжуулж байх юм шиг гэгээн мөрөөдлөөр жигүүрлэж амьдарч байснаа хүлээн зөвшөөрөх цаг нь болсон.
Гуравхан жилийн хугацаатай зээлсэн мөнгөөрөө зам барьж, эргээд эх үүсвэрээ олохгүй, хаанаас мөнгө зээлэх вэ гэдгээ мэдэхгүй байгаа алдаагаа бид хүлээн зөвшөөрөх цаг нь болчихсон байна. Үйлдвэржилтийг дэмждэггүй, хямраад ирэхээрээ дотоодын хэдэн аж ахуйн нэгжүүдээ татвараар дарамталж тэднээс мөнгө саадаг алдаа биднийх л байсан. Ч.Сайханбилэг сайд энэ бүхнийг олж харж, засацгаая хэмээн уриалж байгааг бид бүгд дэмжих хэрэгтэй.
Үргэлжлэлийг энд дарж уншина уу
Манай сайт танд таалагдаж байвал LIKE хийгээрэй. Танд баярлалаа.