Нийгэм
・Нийтэлсэн:
Отгонхүү
・
2014 09 сар 22
“Монос” гэж хүний аминд заналхийлсэн бизнесийн байгууллага амь бөхтэй оршсоор байна. Магадгүй УИХ-ын гишүүн босстойн хэргийг гаргаж байгаа нь энэ болов уу.
Түүнээс биш жирийн нэгэн бизнесмен байсан бол үүд хаалгаа бариад зогсохгүй эрүүгийн хэрэгт татагдах хэрэг өдүүлсэн шүү дээ. Гэтэл нэг хэсэг шуугиан тарьж байгаад чимээ намдаав.
Өдгөөгөөс сар гаруйн өмнө “Монос”-ын харгайгаар ЭХЭМҮТ-ийн Дотрын хоёрдугаар тасагт 15 хүүхэд сэхээнд орж, нэг хүүхэд энгийн тасагт хэвтэн эмчлүүлж байсныг уншигч та сайн мэднэ. Тодруулбал, “Фенорбарбитал” гэх эм нь тархины даралттай хүүхдүүдэд уулгадаг, тайвшруулах үйлчилгээтэй эм ажээ. Тус эмийг худалдаалах зөвшөөрөл “Монос” группийн эмийн сангуудад байдаг учраас өндөр тунгаар хариуцлага алдан өгснөөс ийм байдал үүссэн юм.
Гэтэл өнөөдөр “Монос” гэгч гайтай байгууллага ямар ч гэм зэмгүй мэт үйл ажиллагаа явуулж байгаад олон хүн гайхширч буй. УИХ-ын гишүүн эзэнтэй учраас ийнхүү авирлаж байна уу, эсвэл мөнгө төгрөг, авлигын асуудал яваад байна уу гээд хардах зүйл олон бий. Юутай ч энэ тухайд манай мэдээллийн хэрэгслүүд үнэн бодит мэдээллийг тал талаас нь дэлгэн тавих байх.
Зөвхөн үүгээр ч зогсохгүй эрхэм гишүүн Л.Эрдэнэчимэг ийнхүү өөрийнх нь буруутай үйл ажиллагааг олонд дэлгэхээр “Миний нэр төр бизнест зохион байгуулалттай халдаж байна” хэмээдэг. Тэрээр бизнесээ яаж дэлгэрүүлж, өргөжүүлэх вэ гэдгээ сайн мэднэ. Тухайлбал, “Монос”-ын хуулийн зөвлөх, нэлээд хэдэн охин компанийнх нь ТУЗ-д ажилладаг Д.Ганзориг гэх хуульч залуу “Домог” гэх архи үйлдвэрлэсэн талаар хэдхэн сарын өмнө шуугиж эрхэм гишүүн ч үүнийг эрс үгүйсгэж байсан. Гэсэн ч энэ архийг үйлдвэрлэж байгаа гэх “Арвин-Ундарга” компани “Монос”-т хамааралтай гэдэг нь тодорхой болсон, улайсан шүү дээ. Эрхэм гишүүн маань өөрийнхөө “Домогт” архийг борлуулахын тулд “Архины тухай хууль” санаачилж, шуугиан дэгдээж байлаа.
Л.Эрдэнэчимэг бол бизнеэсээ өргөжүүлэхийн тулд юу ч хийж мэдэх нэгэн гэдэг нь М.Амбага доктортой Салимоны эрх булаалдаж байснаар төвөггүйхэн баилагдана. Тиймдээ ч тэрээр хэсэг хугацаанд төлбөртэй нийтлэл цацуулж докторыг ялж байсан даа. Уг групп дэргэдээ “Монос” дээд сургуулийг ажиллуулдаг гэдгийг хүн бүхэн мэднэ. Тиймээс өөрийнхөө сургуулийг төгсч гарсан мэргэжилтнүүдээ сүлжээ эмийн сангууддаа ажиллуулдаг гэх. Гэтэл тэр сургуулийн бүтээгдэхүүн нь 16 хүүхдийн аминд хүрэх шахсан асуудлыг хууль хяналт, Мэргэжлийн хяналтынхан анхааралдаа авах цаг болчихоод байхад чимээгүй л байна. Хууль тогтоох дээд байгууллагад эзэн нь суудаг болохоор яаж ч чаддагүй хэрэг үү. Эсвэл өнөөх л авлига хээл хахууль гэгч нь үйлчлээд байна уу гээд олон асуудал хөндөж болох.
Ер нь зөвхөн “Монос”-оор зогсохгүй байшин барилга, орон сууц, гэр хорооллын дунд гээд хаа сайгүй эмийн сан нэртэй эмийн бизнес цэцэглэж байгаа. Энэ бүгдэд хяналт шалгалт хийж, дэг журамд нь оруулахгүй бол байдал улам дордож байна.
Дашрамд дурдахад “Монос”-ын энэ алдаатай үйл ажиллагаа, түүнчлэн үүнд ямар ч хариуцлага тооцохгүй байгаа нь бусад эмийн бизнесмэнүүдэд ч нөлөөлж таарна. Яагаад гэхээр тэд хэрвээ алдаа гаргавал “Монос” болон Л.Эрдэнэчимэг гишүүнтэй барьцаж таарна. Аргагүй шүү дээ. УИХ-ын гишүүнийхээ өдүүлсэн том хэрэгт хариуцлага тооцож чадахгүй байж иймхэн зүйлд хариуцлага ярих нь инээдтэй хэрэг хэмээн мэргэжлийн байгууллагыг доромжилж мэдэхээр хандлага ч нийгэмд үүслээ. Тэгэхээр энэ бүгдийг бодолцож “Монос”-ын үйл ажиллагааг сайтар хянаж, хариуцлага тооцвол тооцсон шиг тооцох хэрэгтэй.
Гэтэл хариуцлага тооцох бүү хэл чимээгүй өнгөрлөө. Чухам юуны учир чимээ намдаав гэдгийг ч мэдээллийн хэрэгслүүд сурвалжилж таарна.
Н.Дөл
Эх сурвалж: www.unen.mn
Манай сайт танд таалагдаж байвал LIKE хийгээрэй. Танд баярлалаа.