ОХУ-аас Хятад руу тавих “Талын зам” нэртэй хийн хоолойг өөрсдийн нутгаараа дамжуулахын тулд хамтдаа лоббидъё гэж ОХУ-ын Буриадын ерөнхийлөгч Вячеслав Наговицын монголын талд санал тавьсан байна. 
Ийм саналыг өнгөрсөн оны есдүгээр сард ОХУ-ын ерөнхийлөгч Владимир Путиныг Улаанбаатарт айлчлахад нь Монгол Улсын ерөнхийлөгч Цахиагийн Элбэгдорж бас тавьж байсан юм. 
“Өөрийн улсаа хийн хэрэглээтэй болгох талаар Монгол Улсын ерөнхийлөгч асуудлыг нухацтай тавьж байгаа. Буриад ч бас үүнийг сонирхож байна. Тэгэхээр “Талын зам” төсөл энэ төлөвлөгөөг хэрэгжүүлэхэд тус болно” гэж Наговицын Монголын нийслэл Улаанбтаар хотын захирагч Э.Бат-Үүл тэргүүтэй төлөөлөгчидтэй уулзахдаа хэлсэн байна. 
“Хэрэв бид хамтраад, хүчээ нэгтгэн энэ сэдвийг хөндөж ярьж чадвал энэ асуудлыг шийдэж магадгүй юм” гэж Буриадын тэргүүн тэмдэглэжээ. Үүний зэрэгцээ хийн хоолойг монголоор дамжуулах сонирхол буриадын талд бас өөр бий. Энэ талаар газар зүйн ухааны доктор Арнольд Тулохонов “Монгол эрчим хүчээр дутагдаж байгаа нь үнэн. Иймдээ ч тэд Байгаль нуурын гол цутгал Сэлэнгэ мөрөн дээр Шүрэнгийн усан цахилгаан станц барих гээд байгаа юм. Ингэвэл Байгаль нуур мөхөхөд хүрнэ. Тэгэхээр хийн хоолойг монголын нутгаар дамжуулбал тэд Шүрэнгийн усан цахилгаан станц барих асуудлаа эргэн харж мэдэх юм” гэсэн байна.