Эрүүл мэнд, спортын сайд Г.Шийлэгдамбыг өнгөрсөн долоо хоногт авлигын хэрэгт холбогдуулан, АТГ-аас саатуулсан билээ. Авлига авч байсныг үйлдэл дээр нь илрүүлсэн гэх үндэслэлээр ЭМС-ын сайдыг АТГ-аас сэжигтнээр татаж, 14 хоног цагдан хорихоор болоод байгаа. Хэрэв энэ хугацаанд яллагдагчаар татвал түүнийг цагдан хорих хугацааг дахин хоёр сараар сунгана. Бүр шаардлагатай тохиолдолд 30 хоногоор сунгах эрх нь хуулийнханд нээлттэй гэнэ. Одоогийн байдлаар АТГ-аас сайд Г.Шийлэгдамбад Эрүүгийн хуулийн тусгай ангийн 268-д зааснаар хээл хахууль авах гэсэн зүйл ангиар хэрэг үүсгэн шалгаж эхлээд байна.

Тэгвэл Г.Шийлэгдамба сайд өөрийг нь шалгаж байгаатай холбогдуулан баасан гарагийн үдээс хойш Ерөнхий сайдад үүрэгт ажлаасаа чөлөөлөгдөх хүсэлтээ хүргүүлсэн. Тэрбээр “Би гэмт хэрэг үйлдээгүй, мөрдөн байцаалтын шатанд, эсхүл шүүхийн шатанд энэ нь үнэн мөнөөр тогтоогдоно гэдэгт итгэлтэй байгаа боловч энэ бүхэн нь улс төрийн нөхцөл байдлаас шалтгаалан багагүй цаг хугацаа шаардах нь ойлгомжтой боллоо. Гэмт хэрэг үйлдээгүй, гэм буруугүй гэдгээ Монгол Улсын Шүүхээр тогтоолгож цагаадсаны дараа та бүхэнтэйгээ нэр цэвэр, нүүр бардам дахин уулзана гэдэгт итгэж байна” хэмээн өргөдөлдөө бичсэн тухай мэдээллийг МАХН-ыхан өгөөд байгаа юм. 

Ингэснээр асуудалд ороод буй Г.Шийлэгдамба сайдын огцрох хүсэлтийг Ерөнхий сайд хүлээн аваад байгаа билээ. ТүүнчлэнГ.Шийлэгдамба сайдын асуудлыг өнөөдрийн Засгийн газрын хуралдаанаар хэлэлцэж шийдвэрлэнэ гэж эх сурвалж мэдээллээ. Тэгвэл хүсэлтийг нь хүлээн авсан Ч.Сайханбилэг Ерөнхий сайд ЭМС-ын сайдынхаа хүсэлтийг ёсчилж, сайдын албан тушаалаас нь огцруулахаар тохирсон бөгөөд МАХН-ыхныг сайдын орны хүний сонгохыг үүрэг болгосон гэсэн юм. 

Тэгвэл энэ нь сайд болохыг санаархагчдын дунд багагүй тэмцэл өрнүүлээд авсан сурагтай. Ямартай ч МАХН-ыхан өчигдөр хуралдаж, намын нарийн бичгийн дарга Ц.Шаравдоржийг нэр дэвшүүлэхээр тохирсон гэнэ. Ерөнхийдөө МАХН-аас ЭМС-ын сайдад Н.Удвал, Л.Жамбалжав нарын талаар ч яригдаж байгаа сурагтай. Ямартай ч МАХН-ыхан сайдын суудлаа булаацалдаад тун эв эегүй байгаа гэнэ лээ шүү. Угтаа бол эрүүл мэндийн салбарыг мэддэг, эмч мэргэжилтэй нэгнийгээ тавьчихвал үлдэж буй багахан хугацаанд эрүүл мэндийн салбар ганхахгүй байх нөхцөл бүрдэнэ гэж эрүүл мэндийн салбарын  ажилтнууд хэлж байна билээ. 

Хэнийгээ сайдаар тавихыг одоо МАХН-ыхан л мэдэх хэрэг болж дээ.