 |
УИХ-ын даргын захирамжаар байгуулагдсан Үндсэн хуульд нэмэлт өөрчлөлт оруулах хуулийн төслийг боловсруулах ажлын хэсгийнхэн хуулийн төслөө гараасаа гаргажээ. Одоо төсөл УИХ-ын дарга З.Энхболдын ширээн дээр оччихоод байна. Хуулийн төсөл боловсруулагчид Ерөнхийлөгчийг бүх ард түмнээс сонгодог өнөөгийн тогтолцоог өөрчлөхөөр тусгажээ. Монгол Улс Ерөнхийлөгчтэй байна, тэгэхдээ Ерөнхийлөгчийг бүх ард түмнээсээ санал авч сонгохгүй, харин УИХ-ын өргөтгөсөн бүрэлдэхүүнтэй хуралдаанаар сонгохоор хуулийн төсөлд заажээ. “Ерөнхийлөгчийг сонгох асуудлыг УИХ-ын гишүүд, аймаг, Улаанбаатар, Эрдэнэт, Дархан хотын Иргэдийн төлөөлөгчдийн хурлын дарга нарыг оролцуулсан бүрэлдэхүүнтэйгээр хэлэлцэж, нууц санал хураалт явуулж, олонхийн санал авсан нэр дэвшигчийг УИХ Ерөнхийлөгчөөр сонгогдсон гэж үзэж, бүрэн эрхийг хүлээн зөвшөөрсөн хууль гаргана” гэсэн заалтыг Үндсэн хуулийн 31 дүгээр зүйлийн дөрөв дэх хэсэгт оруулахаар заажээ.
Үндсэн хуулийн энэ өөрчлөлт батлагдвал Монгол Улсын бүх ард түмнээс сонгогдсон Ерөнхийлөгч Ц.Элбэгдоржоор дуусгавар болно гэсэн үг. Үндсэн хуульд ийм өөрчлөлт хийхийг Ерөнхийлөгч Ц.Элбэгдорж зөвшөөрч дэмжиж байгаа гэсэн мэдээлэл ч улс төрийн хүрээнд гарсан байна. Түүгээр ч зогсохгүй Ц.Элбэгдорж дахин зургаан жил Ерөнхийлөгчөөр суух “нүх”-ээ ухаж байна гэдэг хардлага ч явж байна. Учир нь Ерөнхийлөгчийг бүх ард түмнээс биш, УИХ-аас сонгодог болчихвол одоогийн Ерөнхийлөгчид дахин зургаан жилээр сонгогдох эрх зүйн боломж гарч ирэх магадлал тун өндөр байгааг улс төрийн хүрээнийхэн хэлж байна. Үндсэн хуульд оруулах нэмэлт өөрчлөлтөөр бол Ерөнхийлөгчийн бүрэн эрхийг хугацааг зургаан жилээр байхаар оруулсан байна.
Одоогийн манай улсад мөрдөж байгаа хуулиар Ерөнхийлөгчийн бүрэн эрх хоёр удаагийн сонгуулиар хязгаарлагдаж байгаа гэсэн үг. Гэхдээ гурав дахь удаагаа өрсөлдөх боломж хуулийн өөрчлөлт дундаас гарч ирж байсан. П.Очирбат 1990 оны есдүгээр сараас 1992 оны хоёрдугаар сар хүртэлх хугацаанд БНМАУ-ын Ерөнхийлөгч, Монгол Улсын Үндсэн хуулийн хавсралт хуулийн хоёрдугаар зүйлд заасны дагуу 1992 оны хоёрдугаар сараас 1993 онд Монгол Улсын Ерөнхийлөгч, 1993-1997 онд Монгол Улсын Ерөнхийлөгчөөр ажилласан. 1997 оны Ерөнхийлөгчийн сонгуульд П.Очирбат дахин нэр дэвшиж, Н.Багабанди, Ж.Гомбожав нартай өрсөлдсөн билээ. 1992 онд батлагдсан шинэ Үндсэн хууль П.Очирбатыг ингэж гурав дахь удаагаа Ерөнхийлөгчийн сонгуульд өрсөлдөх хууль зүйн үндэслэл болж өгчээ. Тэгэхээр одоо явж байгаа Үндсэн хуулийн нэмэлт өөрчлөлтөөр Ц.Элбэгдоржид бас гурав дахь удаа гэдэг боломж гаргаж өгч болохыг үгүйсгэх аргагүй нөхцөл байдал үүссэн нь тодорхой байна.
Эх сурвалж:
О.НАР
Эх сурвалж
http://www.info.mn
Манай сайт танд таалагдаж байвал LIKE хийгээрэй. Танд баярлалаа.