Генералын хөвгүүд сургуулиа хаяад ирцгээжээ

Улстөр ・Нийтэлсэн: Мэргэн охин ・ 2016 01 сар 19 ・ 3

БХЯ-ны дарга нар өөрийн нэр хүнд, албан тушаалаа ашиглан үе залгамжлагчдаа төрийн зардлаар хилийн чинад өндөр боловсрол эзэмшүүлэхээр илгээсэн авч тэдний эрх танхи хөвгүүд чанга хатуу цэргийн дэг, сургалтын аяыг даалгүй эхнээсээ сургуулиа хаясан байна.

Тухайлбал, БХЯ-ны Төрийн нарийн бичгийн дарга асан эдүгээ яамныхаа ТЗУГ-ын даргаар ажиллаж буй хошууч генерал З.Болдбаатар БХИС-ийн захирлын албыг хашиж байхдаа эрх мэдэл, албан тушаалаа ашиглан өөрийнхөө хүүг БХИС-ийн “Тэмүүжин өрлөг” сургуульдаа элсүүлэн улмаар Туркийн Цэргийн сургалттай тусгай сургуульд явуулсан байдаг. Харамсалтай нь хошууч генералын танхи хүүд лалын ертөнц таалагдаагүй юу эсвэл цэргийн хатуу сахилга батын аяыг даалгүй шантарсан уу ямартай ч өвлийнхөө амралтаар эх орондоо ирээд буцаагүй гэнэ билээ.

Дашрамд өгүүлэхэд, “Тэмүүжин өрлөг” цэргийн дунд сургуулийг үүсгэн байгуулагчдын тухайн үед өгч байсан тайлбараар бол амьдралын бололцоо муутай, өнчин, хагас өнчин хөвгүүдийг сургах зорилготой гэж байсан авч эдүгээ зорилгоосоо ухарч Батлан хамгаалахын салбарын нэр нөлөө бүхий дарга нарын ах дүү төрөл садан цаашлаад арын хаалганы голдуу хүүхдүүд сурдаг болжээ.

Эдүгээ тус сургуулиас гурван сонсогч хар тамхины хэрэгт холбогдон хуулийн байгууллагаар шалгагдаж байгаа. Мөн түүнчлэн БХЯ-ны Гадаад хамтын ажиллагааны газрын дарга асан, одоо АНУ-ын Үндэсний дайны коллежед сурч байгаа хурандаа Д.Ариунболдын хүү нь Японы цэргийн сургуульд сайн эцгийн нөлөөгөөр олон аавын хөвгүүдийн өмнүүр дайран байж явчихаад цэргийн сургуулийн дэг, журманд нь дасахгүй байна хэмээн хошуугаа унжуулсаар сургуулиа орхисон байна.